Heddiw, mae Ofcom wedi cyhoeddi fod Geoff Cooper wedi'i benodi'n Gadeirydd nesaf Channel 4.
Bydd yn ymuno â Bwrdd y darlledwr ar 1 Hydref, gan olynu'r Cadeirydd dros dro Dawn Airey CBE.
Mae gan Geoff, Cadeirydd cyfredol AO World plc, dros 30 mlynedd o brofiad ar Fyrddau ar draws amrywiath o gwmnïau cyhoeddus a phreifat yn y DU, gan gynnwys fel Cadeirydd yn Dunelm, Card Factory, Brakes a Bourne Leisure, ac fel cyfarwyddwr anweithredol yn Informa ac Abbey National.
Mae ei yrfa yn cynnwys bron i 10 mlynedd fel Prif Swyddog Gweithredol yn Travis Perkins plc ac fel Dirprwy Brif Weithredwr yn Alliance UniChem plc, ar ôl bod yn Gyfarwyddwr Cyllid Grŵp yn flaenorol. Mae hefyd wedi bod yn gynghorydd i uwch-weithredwyr, ecwiti preifat, cyfalaf menter a busnesau cychwynnol, ac wedi cadeirio cymdeithas fasnach fawr.
Mae penodiad Geoff am dymor o dair blynedd wedi'i gymeradwyo gan yr Ysgrifennydd Gwladol dros Ddiwylliant, y Cyfryngau a Chwaraeon, y Gwir Anrhydeddus Lisa Nandy AS.
Dywedodd yr Ysgrifennydd Diwylliant Lisa Nandy: "Mae Channel 4 yn sefydliad cenedlaethol gwerthfawr sydd â hanes o greu teledu arloesol sy'n adlewyrchu Prydain yn ei holl amrywiaeth.
"Rwy'n edrych ymlaen at weld Geoff Cooper yn helpu Channel 4 i barhau i ddarparu rhaglenni o'r safon uchaf ac addasu i dirwedd gyfryngau sy'n newid."
Dywedodd yr Arglwydd Grade, Cadeirydd Ofcom: "Mae penodiad Geoff Cooper yn dilyn proses recriwtio drylwyr a chystadleuol, ac fe ddangosodd y rhinweddau rhagorol sydd eu hangen i lywio Channel 4 i ddyfodol cynaliadwy."
Dywedodd Geoff Cooper: "Rwy'n falch iawn o gael fy mhenodi'n Gadeirydd Channel 4 ac i fod yn rhan o'i lwyddiant parhaus fel dylanwad sylweddol ar gymdeithas, diwylliant, diwydiannau creadigol ac economi ehangach y genedl.
"Mae pobl Channel 4, partneriaid yn y sector cynhyrchu annibynnol a thirwedd y cyfryngau ehangach, a gwylwyr yn hanfodol wrth gynrychioli lleisiau anhysbys, herio gyda phwrpas ac ailddyfeisio adloniant, ac edrychaf ymlaen at wasanaethu pob un ohonynt".
Nodiadau i Olygyddion
Mae'n ofynnol i Ofcom o dan Ddeddf Darlledu 1990 benodi aelodau anweithredol i Fwrdd Channel 4, yn amodol ar gymeradwyaeth yr Ysgrifennydd Gwladol.