Heddiw mae Ofcom wedi cyhoeddi ei benderfyniadau terfynol ar gynlluniau’r BBC i lansio pedair gorsaf DAB+ newydd ac ymestyn oriau Radio 5 Sports Extra.
Cynigion y BBC
Ym mis Tachwedd y llynedd, cynigiodd y BBC lansio pedair gorsaf DAB+ newydd: Radio 1 Dance, Radio 1 Anthems, estyniad ar Radio 2, a Radio 3 Unwind. Cyhoeddodd gynigion hefyd i ehangu oriau darlledu Radio 5 Sports Extra.
Yn unol â’r broses a nodir yn Siarter a Chytundeb y BBC, mae’n ofynnol i’r BBC ac yna Ofcom ystyried effeithiau newidiadau ‘berthnasol’ i’w wasanaethau cyhoeddus teledu, radio ac ar-lein ar gystadleuaeth.
Roeddem o’r farn bod y cynigion hyn yn ‘berthnasol’, fel y gwnaeth y BBC, ac felly cynhaliwyd Asesiadau Cystadleuaeth llawn. Mae’r rhain yn archwilio a yw gwerth cyhoeddus y cynigion yn cyfiawnhau’r effaith debygol ar gystadleuaeth deg ac effeithiol.
Ym mis Ebrill, daethom i’r casgliad dros dro y gallai’r BBC fwrw ymlaen â chynlluniau ar gyfer gorsafoedd Radio 1 Dance, Radio 1 Anthems a Radio 3 Unwind, ond nid ei chynigion ar gyfer sbin-off BBC Radio 2 nac ehangu oriau Radio 5 Sports Extra.
Ein penderfyniadau
Yn dilyn ymgynghoriad ar ein casgliadau dros dro, rydym heddiw wedi cyhoeddi ein penderfyniadau terfynol. Yn gryno:
- Gall Radio 1 Dance, Radio 1 Anthems a Radio 3 Unwind fwrw ymlaen. Canfuwyd gennym mai effaith gyfyngedig y byddai’r gorsafoedd hyn yn ei chael ar gystadleuaeth deg ac effeithiol, a fyddai’n cael ei chyfiawnhau gan werth cyhoeddus y cynigion.
- Ni chaniateir estyniad Radio 2 y BBC, a fyddai’n darlledu cerddoriaeth a chynnwys archif o’r 50au, y 60au a’r 70au, fynd yn ei flaen. Er y gallai’r cynnig ddarparu rhywfaint o werth cyhoeddus, ni fyddai hyn yn ddigon i gyfiawnhau’r effaith sylweddol ar gystadleuaeth deg ac effeithiol, sy’n cynnwys y potensial i leihau cymhellion buddsoddi ar gyfer gweithredwyr radio masnachol.
- Mae’n bosibl na fydd cynlluniau’r BBC i ymestyn oriau darlledu Radio 5 Sports Extra yn mynd rhagddynt. Er y gallai gynnig rhywfaint o werth cyhoeddus, er enghraifft drwy ehangu faint o chwaraeon sydd ar radio llinol, ni fyddai hyn yn ddigonol i gyfiawnhau’r effaith sylweddol y byddai’n ei chael ar gystadleuaeth deg ac effeithiol, yn enwedig ar rwydwaith talkSPORT.
Ar wahân, rydym hefyd wedi penderfynu y bydd y tri gwasanaeth newydd y gellir bwrw ymlaen â hwy yn cael eu cwmpasu gan amodau trwydded gweithredu bresennol, ac ni fyddwn yn cyflwyno amodau newydd ar gyfer y gwasanaethau hyn ar hyn o bryd.