Ar agor
Rhaglen Orfodi i fonitro a yw gwasanaethau'n cyflawni eu dyletswyddau asesu risg plant o dan Ddeddf Diogelwch Ar-lein 2023.
9 Gorffennaf 2025
Heddiw mae Ofcom yn agor rhaglen waith neu ‘rhaglen orfodi’ i fonitro a yw darparwyr yn cydymffurfio â’u dyletswyddau asesiad risg plant a chadw cofnodion o dan y Ddeddf Diogelwch Ar-lein (y “Ddeddf”).
Prif nodau'r rhaglen hon yw monitro cydymffurfiaeth â’r dyletswyddau perthnasol yn y Ddeddf, monitro sut mae'r diwydiant yn rhoi ein canllawiau asesiad risg a’n canllawiau cadw cofnodion ar waith er mwyn cefnogi a meithrin yr arferion gorau.
Adran 11, 23, 28 a 34 o’r Ddeddf.
Heddiw, mae Ofcom wedi agor rhaglen orfodi i fonitro a yw gwasanaethau'n cyflawni eu dyletswyddau asesu risg plant a chadw cofnodion.
Roedd yn ofynnol i bob gwasanaeth defnyddiwr-i-ddefnyddiwr a gwasanaeth chwilio gynnal, a chadw cofnod ysgrifenedig o, asesiad mynediad plant erbyn 16 Ebrill 2025 i sefydlu a yw'n debygol y bydd plant yn cael mynediad at wasanaeth.
Lle mae gwasanaeth yn debygol o gael ei gyrchu gan blant, rhaid i’r gwasanaethau hynny hefyd gynnal asesiad risg plant erbyn 24 Gorffennaf 2025. Mae hon yn rhwymedigaeth gyfreithiol sy’n ei gwneud yn ofynnol i ddarparwyr asesu’r risgiau y bydd eu cynnwys sy’n gysylltiedig â'u gwasanaeth yn niweidiol i blant. Rhaid i ddarparwyr hefyd chadw cofnod ysgrifenedig, ar ffurf hawdd ei deall, o bob agwedd ar bob asesiad risg plant, gan gynnwys manylion am sut y cynhaliwyd yr asesiad a'i ganfyddiadau.
Ar 24 Ebrill 2025, cyhoeddodd Ofcom Ganllawiau Asesiad Risg Plant a Phroffiliau Risg Plant i helpu darparwyr i gydymffurfio â dyletswyddau asesu risg plant. Mae'r canllawiau hyn yn nodi proses asesu risg pedwar cam, a fydd, os caiff ei dilyn, yn helpu darparwyr i gydymffurfio â dyletswyddau asesu risg plant. Fe wnaethom hefyd gyhoeddi Canllawiau Cadw ac Adolygu Cofnodion i helpu darparwyr i gydymffurfio â'u dyletswyddau cadw cofnodion. Mae'r canllawiau hyn yn nodi'r hyn a ddisgwylir gan ddarparwyr mewn perthynas â chofnodion eu hasesiadau risg, gan gynnwys yr asesiad risg plant.
Yn unol â dyletswyddau asesu risg plant yn dod i rym, rydym wedi penderfynu gofyn am gofnodion o asesiadau risg plant gan nifer o ddarparwyr gwasanaethau o fewn y cwmpas. Byddwn yn defnyddio'r wybodaeth a ddarperir i nodi pryderon cydymffurfio posibl, ac i fonitro sut mae ein canllawiau asesiad risg plant a'n canllawiau cadw cofnodion yn cael eu cymhwyso gan y diwydiant.
Rydym yn disgwyl i'r rhaglen hon redeg am o leiaf 12 mis, ac yn ystod y cyfnod hwnnw efallai y byddwn yn penderfynu agor ymchwiliadau ffurfiol ar wahân os oes gennym bryderon nad yw darparwr gwasanaeth yn cyflawni ei ddyletswyddau o dan y Ddeddf. Byddwn yn cyhoeddi diweddariadau ar gynnydd ar adegau perthnasol dros y cyfnod hwn.