Mae Ofcom yn ymgynghori ar ganllawiau ar gyfer llwyfannau ar-lein sy'n nodi pa wybodaeth y bydd angen iddynt ei chadw am weithgarwch plentyn os bydd crwner yn ymchwilio i'w farwolaeth.
Pwerau newydd
Ym mis Mehefin, pasiwyd Deddf Data (Defnyddio a Mynediad) 2025, a roddodd bwerau newydd i Ofcom a all helpu rhieni mewn profedigaeth i gael atebion pan fydd gweithgarwch cyfryngau cymdeithasol yn gysylltiedig â marwolaeth eu plentyn.
O 30 Medi, bydd Ofcom yn gallu dweud wrth gwmnïau technoleg am gadw data am yr hyn y mae plentyn wedi’i wneud ar eu platfform cyn ei farwolaeth, os gofynnir amdano gan y crwner sy'n ymchwilio i farwolaeth y plentyn. Heddiw, rydym wedi cyhoeddi canllawiau arfaethedig ar y wybodaeth y bydd angen i gwmnïau technoleg gwybodaeth ei chadw yn y sefyllfaoedd hyn.
Canllawiau arfaethedig
Mae rhai llwyfannau ar-lein yn dileu data defnyddwyr yn awtomatig os yw eu cyfrif yn anweithredol am gyfnod penodol. Y cynharaf y gall Ofcom gyhoeddi 'Hysbysiad Cadw Data' i blatfform ar ôl marwolaeth plentyn, y mwyaf tebygol fydd hi y gellir llwyddo i gadw unrhyw wybodaeth a allai fod yn berthnasol i ymchwiliad crwner.
Er mwyn gallu gweithredu’n gyflym yn yr amgylchiadau hyn a'i gwneud hi'n haws i lwyfannau ddod o hyd i ddata perthnasol, rydym yn cynnig nodi mewn canllawiau’r mathau o wybodaeth y gallai crwneriaid ddymuno ei darparu i Ofcom am y plentyn os yw'n hysbys ar y pryd, a'r mathau o ddata y bydd yn ei gwneud yn ofynnol i lwyfannau eu cadw yn gyffredinol.
Gwrando ar rieni mewn profedigaeth
Rydym yn ymwybodol o'r straen emosiynol sy'n wynebu aelodau'r teulu pan ofynnir iddynt chwilio dyfais bersonol plentyn am wybodaeth cyfrif i gynorthwyo crwner. Rydym am sicrhau bod y broses hon yn gweithio gydag ac ar gyfer teuluoedd mewn profedigaeth, gyda’r baich lleiaf posibl yn cael ei roi arnynt ar adegau o alar a gofid.
Rydym eisoes wedi derbyn safbwyntiau amhrisiadwy gan grŵp o rieni mewn profedigaeth ar sut y gellir rheoli'r broses yn effeithiol ac yn dosturiol. Rydym yn ddiolchgar iawn am eu mewnbwn parhaus, ac rydym yn parhau i fod yn ymrwymedig i ystyried y safbwyntiau hyn wrth i ni gwblhau ein canllawiau.
Camau nesaf
Rydym yn croesawu ymatebion i'r ymgynghoriad ar ein canllawiau arfaethedig erbyn 5pm ar 28 Hydref 2025. Ein nod yw cyhoeddi ein canllawiau terfynol erbyn diwedd 2025, unwaith y byddwn wedi ystyried yr ymatebion.